I ha d SVP-Gen vom Toni Brunner isoliert – Schnitzelbängg 2012

Posted on März 3, 2012 von

2


Gripen, SVP, Berlusconi, Merkel, Sarkozy und Hildebrand; sie dominierten die „drey scheenschte Dääg“. Hier eine Zusammenstellung der besten politischen Schnitzelbängg der Basler Fasnacht 2012. Weitere Verse finden sich beim Comité Schnitzelbängg.

Gripen

Der gsamti Bundesroot duet kund:
«Loss di impfe, so blybsch gsund.»
Nur ain, dä halted sich nit draa:
Der Ueli will die Gripen haa.
(- D Emigrante)

Dr „Tiger“ wurdi nümme bysse,  är kaufi drum dr „Gripe“
denn s alti Flugi syg verschlisse,  saage siessi Lippe.
Ueli ! D Flugi sin doch glyych  die mache vyyl z vyyl Grüsch
und für dr Grieg mit Oeschtryych – länggt dr Didier Cuche.
(- Blauäugige)

SVP

I ha d SVP-Gen vom Toni Brunner isoliert,
Und mine Labor-Ratte iniziert.
Nach drei Injektione – i stich zwüsche d Ohre,
Hän si komplett d Orientierig verloore.
Diagnose:
Und sprützisch ne Baader-Gen in Grind,
Denn wärde d Ratte praktisch blind
(- Doggter FMH)

Es sait dr Didier Cuche: «Zämme, i has gsee!
Y haus uf Afrika, wot nyt me gsee vo Schnee.»
Zwai Minute noch sym Ruggtritt – dr Cuche isch kuum us dr Diir –
Schreit dr Blocher: «Dasmool kaani nyt derfiir!»
(- Dootebainli)

Dootebainli

D SVP will Immigrante integriere
Und duet drum nei in Fuessballschuele inveschtiere
Wil wenn die leere dribble, kigge und em Ball schnäll noochelaufe
Kasch si fir vyyl Gäld ins Ussland zrugg verkaufe.
(- Dootebainli)

BAZ

I bi gärn e Schwyzer, ha Angscht um mi Land,
i lieb der Heer Blocher und bi geege s Ussland,
Die Nätte und Lingge hänn e saubleede Latz
Dää Väärs schaffts als ainzige sicher in d BaZ.
(- Schooffsuuri)

Europa

Im Berlusconi hänn si noo-dis-noo
Amtsitz, Amt und Würde gnoo.
S Ainzig, wo s em no hänn gloo,
Isch si Bunga – Bunga – Bungalow.
(- Anggewegglimaitli)

I ha dr Carla Bruni ihr Buschi entbunde,
Jo, i weiss, si hän halt kei bessere gfunde.
59 Centimeter, vo de Fiessli bis zu dr Chappe:
I mein do s Buschi, nit dr Babbe.
Diagnose:
Dä Chlei het sone grossi Chlappe.
I mein nit s Buschi – i mein dr Babbe.
(- Doggter FMH) 

Hett s Portmonee Ebbe? Denn muesch afo spaare.
Duesch s Auti verklitsche und denne Drämmli faare.
Im Grosse bi der EU lauft s gliche Gschiss.
Fyyr fünf Stutz pro Stai griegsch d Akropolis.
(- Blagèèri)

Hildebrand

My Frau het chürzlig Dollar poschtet.
Das het mi voll dr Poschte koschtet.
I han ere zwar dr Wäg verspeert zu irem Hushaltsgäld,
doch läider zellt si zu de sterkschte Fraue vo dr Wält.
(- Stächpalme) 

Hoffedlig isch das kai Schand
y ha kai Väärs iber der Hildebrand
entschaide due nit yych elai
das macht my staarggi Frau dehai.
(- Pierrot)

Der Philipp Hildebrand het sy Job verloore.
D Mainige göön usenand‘ in allne Foore.
Nur der Paapscht lächled still und dänggt sich ganz genau:
Isch das e Gligg, haan yych kai Frau!
(- Die Haiggle)

Divers

Amerika het ungeniert
Der Strauss-Kahn aifach arretiert.
S wär gschyder, me miecht us däm Stier en Ox
Oder speert en in son e Verrichtigsbox.
(- Anggewegglimaitli)

S`befiehlt dr Pabscht im Petersdom,
Im Klerus dr Gebruuch vo Pariser und Kondom.
Vor allem dr Klerus sell dä Gummi nütze,
Schliesslig muess me d`Mineschtrante schütze!

Als wyttere Schutz gitt`s im Gottedienscht e neji Norm:
Sie bruuche statt Wejrauch ab sofort Chloroform.
(- Glettyse)

————————————————————————————————————————————————————

→ (Sch)merz in der Wüste – Schnitzelbängg 2010
→ Dr nümmi Doggder Guttenberg –  Schnitzelbängg 2011

————————————————————————————————————————————————————
Posted in: Events