Schnitzelbängg 2013

Posted on Februar 24, 2013 von

0


An den Schnitzelbänken lernt man auch mal etwas über die Sorgen der Basler: So war  der neu gewählte FDP-Regierungsrat Baschi Dürr, weil er am Freitagmorgen lieber Wäsche wäscht als im Büro zu sitzen, fast allen Sängerinnen und Sängern einen flottenVers wert. Unisono wurde ausserdem zum Klagelied über den Grünton der Basler Tram, ihren unzuverlässigen Fahrplänen und der Verzürcherung der BAZ eingestimmt. Hier eine Zusammenstellung der besten politischen Schnitzelbängg der Basler Fasnacht 2013 (alle Comité Schnitzelbänke hier)

#Aufschrei

Isch vilicht hitt Oobe der Brüderle doo?
Ja sii, i frog nit nummen esoo.
Mi Dirndl wär sunscht e Risiko,
Drum han i prophylaggtisch e Burka doo.
(- Anggewegglimaitli)

Baschi Dürr

Sii, das find ych scho dr Hit: Dä Baschi Dürr cha wäsche,
cha Windle wächsle, butze, är git em Buschi d Fläsche.
Nääbebyy striggt är für d ART und choche cha är au,
wenn dä jetz no regiere cha, denn isch dä glatt e Frau.
(- Heiri)

BAZ

Jede Daag schrybt d Baasler Zytig vo Schleeger, Schiessereye,
vo Vergwaltiger und Däschedieb, vo settige, wo spraye.
Du gwöhnsch di an s Unglügg und Verbräche, findsch es nüm so gäil.
Jä, wotsch es richtig kriminell, denn liis dr Wirtschaftstäil.
(- Heiri)

D BAZ wird glyy in Ziiri druggt,
also ich bi sicher nit verruggt,
denn s Niveau het mi scho immer gsteert,
jetzt isch si doch dert, wo si ane gheert.
(-Pierrot)

Sarkozy, Putin, Berlusconi & Co.

(- Schlyffstai)

Mörgeli

Im Museum wird’s Nacht. Waisch, was dr Mörgeli macht?
Im Inschtitut e herrligi Rue-
do hesch scho immer gmeint, s‘ isch zue.
Will, was dä SVP-Prophet doziert,
e Studänt vo hit nit interessiert.
Däm sys Wältbild passt akkuraat
zu syne staubige Exponaat
(- Schlyffstai)

Namensgesetz

Me daarf in Zuekumft nümm e Doppelnamme haa:
Nümm Schneider-Ammann, Hueber-Hotz, Vetsch-Boodemaa.
Me muess sich halt entschäide, und dasch doch käi Schand:
Nümm Meier-Bluem, nümm Müller-Frey, nümm Basel-Land.
(- Singvogel)

„Unterwegs zuhause“ mit der SBB

(- Singvogel)

Papst Benedikt

S het Kaine das im voruus gwisst, kai Mentsch hets kennen ahne
dr Benedikt in Rom, dä gheyt dr ganzi Bättel aane.
Das isch kai Schnällschuss gsi, dä Ruggdritt duet sich nämmlig lohne
är griegt, wenn är katholisch blybbt, rund 70 Millioone!
(- Schwoobekäfer)

Si, der Papscht Benedikt mit some fascht 86 Länz
mäldet sich bi mir a für e medizinishi Audiänz
ich seh sofort, dass er stark duet zittere
jä, das het är jetzt – vo sim ständige Twittere.
(- Doggter FMH)

Ständerat

Mi Sohn isch letschti mit em Zügnis heispaziert
und het im Rächne stolz e Zweier präsentiert.
Mathe Nochhilfstunde het er keini welle,
er wärdi Ständerot, die könne au nit zelle!
(- Wäägwyyser)

Dr Leerer Maier sait zem Fritzli:
„Bim Zelle, gäll, doo glemmt s e bitzli.
Du waisch, wenn das so wytergoot,
längt s numme fir in Ständeroot.“ 
(- dr Spitzbueb)

Europa

Im Summer z Kreta liige mir am heisse Strand,
kunnt ein verby und steckt e Sunneschirm in Sand.
„Koschtet nix“, sait dä, sy Finger zeigt nach oobe,
das isch wie Rettigsschirm – zahled alles d Schwoobe.
(- Wäägwyyser)

Olympia

Olympia im Bündnerland – das gääb e Riisefescht
mit Milliarde Defizit und mit illuschtre Gescht
Nur derft me dert uff kai fall s Vreni Schneider singe losse
Sunscht wurd sy uns, so wie sy danzt, no als Problembär gschosse
(- Dreidaagsfliege)

Nathalie Rickli

My alte Gaashäärd – Sii, dä het’s jetz glaub denn bald mol gsee
Dä maant mi an d Frau Rickli vo dr Zürcher SVP
Eb Gutzi, Waaie, Gratin, Brootis – was d in däm wottsch mache
Het ussen-umme Burnout und isch inne nid ganz bache.
(- Dreidaagsfliege)

 

Posted in: Events, Humor